السلام عليكم ورحمة الله وبركاته
أكيد هخرج في يوم مرجعش
أكيد هنام في يوم مصحاش
فبلاش
بلاش يا عمر فراق
كفايه الغربه جوايا
لجوايا كل يوم تشتاق
جوانا كل يوم الوجع
لليل الهموم سباق
يا كفن في قلب النعش
انا قلبي جوا ضلوعي
يتمنى يوم لو عاش
جميله نعمة النسيان
وانا عيني للدمع مبتنساش
والأجمل فرحة روح
بس العمر يا روح
فرحه لسه مجاش
يا شمس كل يوم طالعه
ليه عتمه الضلوع فينا
ليه حبنا بقى سلعه
الكل بايعها ولا حد شارينا
دا النيل ميته بتروي
قبل احبابنا اعادينا
ولا حود علي زرعتي سقاها
بور أرضي وفيضان نيلها
ماجاش
يا سماعين شعري
وقاريين في الحروف احساسي
دانا م الهموم راح شعري
وباعوني قبل العدا
أهلي انا وناسي
ولما شكيت الجرح لمشاعري
قالتلي ياعم إفرح
هخليك أعز جُلاسي
همك وجرحك دول نبضي وشراييني
ودمعك اللي علي خدودك
دول دوا عيني
فبلاش
بلاش تمشي وخليني
دا للفكر في الراس ذكرى متتعوضش
وبالذكرى الحياه تتعاش
ولو هخرج في يوم ومرجعش
ولو هنام في يوم ومصحاش
هتفضل الحروف عايشه
لو حبري فوق الورق باش
22/5/2019
11.30 مساءاً
ياسر ابراهيم